L'uniun da troccas ZyTro
Sin questa pagina anflas tuttas infurmaziuns davart l'uniun da troccas Zytro.
Suprastonza
Presidenta | Laura Jemmi |
Actuara | Lisa Dermont |
Cassier | Gion-Andri Cantieni |
Statutas
I Disposiziuns generalas
Art. 1
La Zytro è in'uniun surconfessiunala e politicamain neutrala tenor art. 60 ss. dal cudesch civil svizzer cun sedia a Turitg.
Art. 2 Intent
La Zytro
* cultivescha e promova il il gieu da Troccas en la regiun da Turitg
* stgaffescha collegialitad e cumpagnia tranter ils commembers
Art. 3 Commembranza
Commembras e commembers da la Zytro pon esser tut las persunas natiralas.
Art. 4 Meds finanzials
Per ademplir l’intent da l’uniun dispona ella da suandants meds finanzials:
* Contribuziuns da commembers
* Retgavs dad occurrenzas
* Donaziuns e contribuziuns da tuttas sorts
La contribuziun da commembers vegn fixada da la radunanza generala ed è limitada a maximalmain 15 francs svizzers ad onn.
Art. 5 Organs
Ils organs da la Zytro èn:
a) la radunanza generala
b) la suprastanza
II Radunanza generala
Art. 6 Cumposiziun
La radunanza generala è l'organ suprem da la Zytro. Ella sa cumpona da:
a) commembras e commembers tenor art.3
b) commembras e commembers da la suprastanza
Art. 7 Convocaziun e lieu da radunanza
La radunanza generala ha lieu mintg'onn. La suprastanza u 1/5 da las commembras e dals commembers pon pretender radunanzas extraordinarias.
Il termin è da communitgar 7 dis avant a las commembras ed als commembers. Il lieu vegn fixà da la suprastanza.
Art. 8 Cumpetenzas
La radunanza generala tracta e fixescha las directivas generalas da l'activitad da la Zytro. Ella elegia la suprastanza ed incumbensads/-adas per eventualas funcziuns spezialas. Ella deliberescha il protocol da la davosa radunanza generala, il rapport annual da gestiun da la suprastanza ed il quint. La radunanza generala decida davart la contribuziun annuala.
Art. 9 Procedura per elecziuns e votaziuns
Tuttas elecziuns vegnan fatgas cun tscherna averta, nun ch'in/a commember/-bra pretenda in scrutini. Per tuttas elecziuns e votaziuns vala il pli da las commembras/dals commembers preschents/-as.
Art. 10 Admissiun ed exclusiun
Commember/-bra po daventar mintgin/a che sustegna la finamira tenor art.2 e che correspunda a las premissas tenor art.3.
Commembras e commembers che cunterfan a las finamiras da l'uniun pon vegnir exclus/as da la radunanza generala.
III Suprastanza
Art. 11 Cumposiziun ed elecziun
La suprastanza sa cumpona da 3 commembers/-bras:
* President/a
* Actuar/a
* Cassier/a
Las persunas en suprastanza vegnan elegidas per 2 onns cun il dretg da vegnir reelegidas.
Art. 12 Incumbensas
La suprastanza è l'organ executiv ed administrativ da la Zytro. Ella represchenta la Zytro, exequescha tut las incumbensas da gestiun e convocescha la radunanza generala.
Art. 13 Cumpetenzas
La suprastanza elegia cummissiuns per incaricas specificas.
Art. 14 Sesidas
La suprastanza vegn convocada dal president tenor basegn u sche dus commembers/-bras giavischan ina sesida. Las decisiuns vegnan prendidas cun la maioritad. En cas da paritad da las vuschs tar las votaziuns ha il president/la presidenta la vusch da tagl.
IV Differentas disposiziuns
Art. 15 Dissoluziun
Sche la Zytro avess da sa schliar, duess la facultad restar deponida durant 20 onns tar la Giuventetgna Rumantscha e vegnir restituida a l'uniun, per cas che quella sa constituiss danovamain. Cas cuntrari duess la facultad vegnir duvrada per autras activitads da la Giuventetgna Rumantscha.
Art. 16 Vigur e revisiun dals statuts
La radunanza constitutiva da la Zytro ha approvà quests statuts ils 22 da settember 2013 a Turitg. Els entran en vigur cun quest termin. La radunanza generala po reveder quests statuts cun in pli da 2/3 da las vuschs preschentas.
Laax, ils 22 da settember 2013
Per la Zytro
La presidenta
Laura Jemmi
L'actuara
Lisa Dermont